لست كاتبا و لا قارئا

لست كاتبا و لا قارئا 

بينما اجلس علي سريري في ساعات الليل الاولي و كوبايه الشاي جنبي و الكتاب قدامي ودائما يشرب الناس المنبهات ( الشاي و الكوفي ميكس و احيانا الكابتشينو) لزيادة التركيز في اعمالهم , الا انا اشربها كي اطيل من الوقت لتعطيل المذاكره .او لربما اثناء شربها ياتي ما هو كفيل كي يجعلني اقوم و مذاكرش اصلا . و ها قد اتنهيت من شرب الشاي و لم يحدث اي شئ ( شكلي كده هذاكر ولا ايه ؟؟!!) و اخذت ابحث عن اي شي يعطلني لكني وجدت انني قد استنفذت كل الطرق التي تؤدي الي التعطيل و ليست هناك امامي اي و سيله اخرى ( بس علي مين مانا مش هذاكر يعني مش هذاكر )حينها بدرت الي ذهني فكره عظيمه هي اني افعل شيئا ليس من هواياتي و لا اعرف ايضا ان افعله علشان خلاص انا جربت كل حاجه بعرف اعملها و من هنا قلت انا هكتب مقال... و رغم اني كل من رايتهم يكتبون المقال كانوا دوما قراء لكتاب عظماء و هم يستطيعون انهم يحطوا كام كلمه كده لغويه علي كام كلمه عاميه بطريقه هما فاهمينها ..( بس و مالو اجرب ميجراش حاجه ) .

و لما فكرت اكتب ايه قلت يبقي لازم اكتب عن حاجه مشهوره .. و طبعا اليومين دول مفيش حاجه واخده دماغ الناس غير كاس العالم ... و من هنا جه السؤال
اشمعنا كوره القدم ؟؟ّ!! ليه مش كوره السله ؟؟!! ليه مش البنج بونج ؟؟!!! ليه مش الاسكواش ؟؟؟ ليه مش التنس ؟؟!! ليه مش سباق العربيات ؟؟ ليه مش الجرى ؟؟ ليه مش السباحه ؟؟؟

يعني اشمعنا كورة القدم كل الناس بتحبها ؟؟!! ليه من اغني ناس لافقر ناس كله بيتفرج عليها ؟؟ ليه كل الدول المتقدمه و الدول اللي فيها مجاعات بتتابعها ؟؟ ليه دايما الناس بتتجمع في القهاوي و تدفع فلوس ( 5 جنيه في اصغر قهوه ) علشان تشوف الماتش ؟؟ ... رغم انها مش اصعب رياضه ؟؟  ...ٍ بس ليه ؟؟؟؟؟؟؟؟؟؟؟؟؟؟؟؟؟

قعدت افكر كتير لغايه ما افتكرت سؤال كان صاحبي سالهولي من سنتين لما قالي "ايه الحيوان اللي انت بتحبه " و لما سالته عن سبب السؤال قالي " ان الحيوان اللي انت بتحبه دايما بيبقي فيه صفه موجوده فيك و انت بتحبها" فمثلا : في ناس بتحب القطه لانهم بيحسوا ان فيها روح نونو صغير ... و تلاقي الناس دي في حياتهم بيقلدوا كتير الطفل الصغير تلاقيهم بيتنططوا و يلعبوا و يعملوا كل اللي نفسهم فيه من غير ما يتكسفوا ( ما عدا طبعا انهم يعملوها علي روحهم ) ... ناس تاني بتحب الكلاب لانهم بيحسوا فيه بوفاء ملقيهوش عند ناس تانيين ..و ممكن تلاقي كتيير من الناس دي عاملوا كتير غيرهم بوفاء بس ملقيوش نفس الرد من التانيين عليهم , و ملقيوش حد يردلهم الوفاء ده الا الكلاب ......

طيب و ايه علاقة ده بالكوره ؟؟!! هنا عرفت ان كورة القدم كلنا بنحبها لان فيها حاجه موجوده جوه كل واحد فينا...

و انا بتابع ماتش اسبانيا و هولندا لاحظت حاجه غريبه .. في لاعب في هولندا (روبين ) اول ما يمسك الكوره تلاقي دفاع اسبانيا كان حصلتله رعشه و كل الفريق المدافعين و المهاجمين يرجعوا لورا بسرعه .. و رغم ان دي كانت صعوبه زايده عليه لكن هو كان بيعديهم كلهم و يوصل للجون .. و في الاخر يجيب هدف ....
لقيت ان احنا جوه كل واحد فينا فيه لاعب بيلعب بالكوره و بيحاول يعدي حواجز كتيير بيقابلها في حياته و ده كله علشان يحقق هدفه ..
طب ما برضه كل الرياضات فيها لاعب بيلعب و في الاخر بيوصل للهدف؟؟؟ بس اشمعنا كرة القدم ؟؟ّ!!!

يمكن لانها مزبوطه ؟؟؟ رياضات كتير بتلاقي اجوانها كتيير علشان تفوز .. يعني مثلا كوره السله تلاقي النتيجه حوالي 80 او 90 جون و البينج اللي بيفوز بيبقي جايب 21 جون ارقام كبيره شويه ( اينعم هي ممكن تمثل اهدافنا الصغيره في حياتنا بس كتير منها بتكون اهداف ضعيفه و مش اساسيه و حتي لو ضاعت مش بنزعل عليها او لو زعلنا عليها بننساها بسرعه و نحط اهداف غيرها ).. و دي كمان حاجه مش بنلاقيها مثلا في الشطرنج ( لعبه اللي بيتفرج عليها يحس انها بطيئه و طويله و ممله و كمان ممكن ميكونش فاهم هي بتتلعب ازاي )
....كوره القدم بتشوف فيها واقع حياتك بصوره مصغره .. .بتشوف اللاعب و هو بيجرى و اول ما تبص علي منظر الدفاع اللي واقف قدامه تحس انه من الصعب او مستحيل انه يقدر يعدي من العدد ده كله .. و تلاقيه فجاه قدر يعدى منهم و قدر يوصل للجون بس ممكن في اخر لحظه الكوره تطير بعيد او ينشنها غلط و حتي حارس المرمي يصدها بعد ما يكون اللاعب عمل اقصي حاجه عنده .... و في الاخر رغم تعبه فهي مش جون .

بس ياتري اللاعب ده بيعمل ايه ؟؟ بيسيب الماتش و يمشي ؟؟؟ لا بيرجع من الاول تاني و يجرب تاني .. يعني بيقعد 45 دقيقه في كل شوط بيحاول فيهم حتي و لو فريقه دخل فيه اجوان ... مش بيمنعه عن انه يهاجم الا صفارة النهايه ... بس ايه علاقه ده بينا ؟؟
... مش هنسي منظر الطفل اللي كان عايز يوصل للعبه اللي اهله مخبينها منه فوق الدولاب و اول ما لمحها قال انه عايزها .. و لما هما مارضيوش قعد يعيط ... و هما قالو مسيرو هيسكت .. بس هو ماسكتش قعد يعيط ساعتين و يحاول بكل الطرق انه يوصل للعبه بس مقدرش لانه اصلا بيمشي بالعافيه .. لحد ما اهله شغلوه بحاجه تانيه نسته موضوع اللعبه ( و لو مكانش نسيها او حد فكره بيها مكنش هيبطل عياط حتي و لو منع نفسه من الاكل و الشرب )

دي طبيعه حطهالنا ربنا ان كل واحد بيبقي عنده اهداف من اول الطفوله بس كتير مهما يحاول يجري عليها ممكن في النهايه يتصدم انه ميحققهاش .. رغم انه عمل كل حاجه في ايده ..و بقي بيشوف صوره لحياته في كورة القدم ... ده كمان احيانا بيختار الفريق اللي يشجعه علي صفات موجوده فيه ( زي الحيوان اللي بيحيه ) .. اعرف احد الاشخاص الذي بدا يشجع فريق برشلونه لانه اول مره كان يتابع فيه ماتش للفريق راي اللاعب ميسي يستطيع ان يمر خلال كل المدافعين و يصل و يحرز الهدف ... و من هنا اصبح يشجع هذا الفريق حتي و ان راه ينهزم في ماتشات اخري و ذلك لانه شعر انه بحاجه الي ان يعبر حواجز حياته بهذه السرعه ..و كمان في مصر ممكن نكون اول مره عرفنا اسماء نوادي ممكن تكون اخترت النادي الاهلي انك تشجعه علشان عرفت بيفوز كتير ( و انه دايما بيقلب النتيجه و يدخل الجون في اخر دقيقه ) ممكن تكون بتكره الزمالك علشان "كان" بيتهزم كتير ...رغم انك ممكن في وقتها متكونش بتعرف اللعيبه مين او المدرب مين .. بس المهم مين اللي بيفوز ... و ده كمان سر عظيم لارتباط الشعب المصري بالمنتخب بتاعه و اللي فعلا بيمثل حقيقه كل واحد فينا انه ممكن طول الماتش يفضل نايم و اول ما يحس ان الماتش هيخلص تلاقيه اتقلب لكائن تاني و بيلعب لعب محترف جدا مهما كان الفريق اللي قدامه . و كمان بيقدر يفوز في ظروف صعبه و قدام اكبر الفرق ( ايطاليا مثلا ) رغم انه ممكن يلعب مع فريق ضعيف و يبقي مستسهل الدنيا فيتنفخ في الماتش ... زينا بالظبط في موضوع الاهداف الصغيره ...

عزيزي القارئ .... اذا شاهدت مباراه لفرق انت لا تشجعها او حتي لا تعرفها فانك تلقائيا تجد نفسك تشجع احدى هذه الفرق و ليس بالضروره ان يكون هو الفريق الفائز بل احيانا كثيره نجد انفسنا نشجع الفريق المهزوم و بيكون نفسنا انه يدخل اهداف و يرجع النتيجه و كمان يفوز  ( و ده مش عشان تواضع او تضامن مع الضعيف ) ده لاننا بنكون احيانا في مواقف ضعيفه في حياتنا و بيكون نفسنا لو ان الزمن يرجع او المواقف تتقلب و نبقي احنا اللي فايزين ...من الاخر ::: ات بتلعب في ماتش اسمه الحياه ,, و الدفاع كله هيحاول يمنعك,, و لو عديته هتلاقي حارس واقفلك عند هدفك علشان يمنعك ... سواء دخلت الهدف او مدخلتهوش لازم تكمل لعب قبل ما الصفاره تصفر و ساعتها هتتمني انك تلاقي دقيقه وق بدل ضايع ( بس دي مفيش منها في حياتك ).... و اوعي تياس .. الكلام ده مش كلام مقال ليك .. لا دي حاجه موجوده جواك هي اللي بتخليك تعمل كده .. اكتشفها و اكتشف نفسك ...

و اخيرا انتهيت من كتابه المقال و قد غلبني النعاس ..فاذا عجبك المقال فهذا يعني انني استطعت ان استفيد انا شخصيا من مقالي و ان افعل شيئا لم افعله من قبل .. و ان لم يعجبك فهذا يعني انك الان تمثل بالنسبه الي حارس مرمى يمنعني من هدفي ليس فقط لانه لم يعجبك مقالي ( ففي مقالات كتير و حشه ) لكنك ايضا تعترض علي الطريقه المبدعه التي قد ضيعت بالفعل بها وقت المذاكره .. و هي ( لو خلصت كل اللي تعرفه , اعمل اللي متعرفهوش)

بقلم جرجس حسنى

16/6/2014

4:33  am

 هذا المقال خاص بموقع info  مشكل ......... معلومات مفيدة